کبھی آپ نے سوچا ہے کہ جب ایک لڑکی اپنے کیرئیر کا انتخاب کرتی ہے تو گھر والے کہتے ہیں بیٹا، یہ سب خواب ہیں، اصل زندگی تو شادی کے بعد شروع ہوتی ہے، لیکن جب وہی لڑکی شادی کے بعد اپنے خواب پورے کرنا چاہے تو سسرال والے کہتے ہیں اب تمہاری اصل زندگی یہی ہے، بہکاوے میں مت آؤ۔
کیا عورت کی زندگی کا ہر موڑ اس کے ہاتھ سے پھسلتا چلا جاتا ہے؟
کیا وہ صرف ایک “سٹیج” ہے جس پر دوسرے اپنے ڈائیلاگ بولتے ہیں؟
کیا فیصلہ کرنے کی آزادی صرف مردوں کے لیے بنائی گئی ہے؟
ہمارے معاشرے میں عورت کو زندگی نہیں، زندگی گزارنے کا طریقہ سکھایا جاتا ہے۔ اسے بتایا جاتا ہے کہ کب سانس لینا ہے، کب مسکرانا ہے، اور کب اپنی خواہشوں کو دفن کرنا ہے۔ لیکن یہ کہانی صرف گھروں تک محدود نہیں، یہ ہمارے اسکولوں، دفتروں، اور سڑکوں پر بھی زندہ ہے۔
حقیقی زندگی کے وہ منظر جنہیں ہم نظرانداز کر دیتے ہیں
وہ کلاس فیلو جو ڈاکٹر بننا چاہتی تھی
سارہ نے میڈیکل کا امتحان ٹاپ کیا، لیکن اُس کے والد نے کہا “لڑکیوں کا ہاسٹل میں رہنا مناسب نہیں”۔ آج وہ ایک پرائیویٹ سکول میں ٹیچر ہے۔ اُس کی ڈگری الماری میں، اور اُس کے خواب اُس کی آنکھوں میں دفن ہیں۔
وہ خاتون جو دفتر سے تھوڑی دیر لیٹ ہو گئی
ثناءہ کے لیے ہر صبح ایک جنگ ہوتی ہے: بچوں کو تیار کرو، ناشتہ بناؤ، پھر دفتر پہنچو۔ مگر جب وہ لیٹ ہوئی تو باس نے کہا عورتوں کو نوکری نہیں کرنی چاہیے۔ کیا مردوں کے پاس وقت کے الگ گھنٹے ہوتے ہیں؟
وہ جملے جو عورتوں کی خودی کو مارتے ہیں
عورت کو گھر کی چار دیواری تک محدود رکھو، ورنہ یہ چار لوگوں کی زبانوں تک پھیل جائے گی۔
ہم عورت کو آزادی دیتے ہیں… بس وہ آزادی ہماری مرضی کی ہو۔
عورت کے فیصلے اُس کی نہیں، معاشرے کی ‘ساکھ’ ہوتے ہیں۔
کیا ہم ایک “کلچرل پیراڈوکس” میں جی رہے ہیں؟
ہم عورتوں کو “ماں” کہہ کر عزت دیتے ہیں، لیکن جب وہ اپنے بچے کی پرورش کے لیے طلاق مانگے تو اُسے “بدچلن” کہتے ہیں۔ ہم لڑکیوں کو “پڑھا کر” انہیں ڈاکٹر بناتے ہیں، لیکن اُن کی تنخواہ پر “حق” صرف مردوں کو ہوتا ہے۔
عورت کی مرضی کو معیار سمجھیں، مشکل نہیں
عورت کو فیصلے کرنے دو، چاہے وہ کیرئیر ہو، شادی ہو، یا صرف یہ کہ وہ کون سی چائے پینا چاہتی ہے۔ یاد رکھیں: جس معاشرے میں عورتیں اپنے فیصلے خود لے سکیں، وہاں کے مرد بھی “زندگی” جینا سیکھتے ہیں۔
